’n Skouspel(agtige) vertoning
100 jaar sit nie sommer in enigeen se broek nie – hetsy jy ’n persoon of ’n maatskappy is. Daarom kon Senwes nie vir ’n meer asemrowende kulminasie van sy 100-jaar vieringe gevra het as die Huisgenoot Skouspel nie.
“Die terugvoer wat ons ontvang oor die Skouspel-vertoning is oorweldigend positief. ’n Kombinasie van Senwes se 100ste en Huisgenoot Skouspel se 10de verjaarsdag het gesorg vir ’n vermenigvuldigingseffek, met ’n viering van kreatiwiteit, talent, sukses en professionaliteit as gemene deler,” het Johan Dique (Besturende Direkteur: Senwes) oor die vertoning gesê.
Op Vrydag, 9 Oktober 2009, het sowat 4 700 klante, verskaffers, eregaste en personeel van Senwes hul weg gevind na die Sun City Superbowl, na ’n vertoning wat spesiaal deur Senwes uitgekoop is vir hul 100-jaar vieringe. In ’n gesamentlike groeteboodskap, het Japie Grobler en Johan Dique die vertoning afgeskop met ’n huldeblyk aan alle belanghebbendes se bydrae tot Senwes se geskiedenis én toekoms. My Land, ’n gedenklied wat spesiaal vir die eeufeesvieringe gekomponeer is, het net na ’n kort pouse die Superbowl deur weerklink.
“Ons is ingenome met die indrukwekkende wyse waarop Senwes se eerste 100 jaar in landbou afgesluit kon word. Dankie aan elke klant en ook ons verskaffers vir jul ondersteuning van die eeufeesvieringe en veral die Skouspel-naweek,” was Johan Dique se kommentaar.
Gholf saam met Gary Player
Die gebruiklike Huisgenoot gholfdag het vanjaar as die Senwes/Huisgenoot prestige gholfdag op die Gary Player-baan met ’n totaal van 100 spelers gespog. Dié gholfdag is kort op die hakke van die Skouspel, op Saterdag, 10 Oktober aangebied.
Die formaat van die kompetisie was ’n vierbal-beterbal wat oor 18 putjies gespeel is. Jaco Kriel van Agrinet en Dries Kruger, ’n Direkteur van Senwes, was die kompetisiewenners.
Boer soek ’n ride on...
Senwes se verbintenis met die NAMPO Oesdag kom reeds ’n lang pad, met Senwes wat een van die eerste uitstallers in 1967 op NAMPO Park was. Daarom is dit net gepas dat Senwes se 100-jaar vieringe ook die NAMPO Oesdag betrek het.
Op die amptelike dag van Senwes se 100-jaar wording – 15 Mei 2009 – is 200 klante die kans gegun om een van 100 John Deere ride ons te wen – by NAMPO Park, natuurlik! Dié besonderse gelukkige trekking is deur die sportpersoonlikheid Toks van der Linde en Elma Postma, bekende aktrise en televisie-aanbieder, behartig.
Teen die einde van die dag kon 100 Senwes klante met ’n glimlag sê: “Ons is John Deere-groen!”
Die finaliste wat nie so gelukkig was nie, het darem nie met leë hande huis toe gegaan nie, maar het ’n geskenk van Cipla Agricare ontvang.
Ballonne, koek en hope gees
Op dieselfde dag as wat die John Deere ride ons klante se dag opgekikker het, het Senwes ook vir hul personeel ’n partytjie by hul hoofkantoor in Klerksdorp aangebied.
’n Tydkapsule is in die voorportaal van Senwes ingerig, met die gedagte dat elke afdeling herinneringe van 2009 in die tydkapsule plaas, wat eers oor 50 jaar weer oopgemaak sal word. Tydens dié dag het Senwes ook alle personeellede vir hul deur-lopende samewerking en ondersteuning bedank.
Steven Alberts (Direkteur: Finansies) het Senwes se 100 bestaansjare in perspektief gestel deur daarop te wys dat ongeveer 260 miljoen werksure sedert die stigting van die koöperasie De Centraal Westelijke Co-operatieve Landbouw Vereniging in 1909, afgehandel is.
Johan Dique (Besturende Direkteur) het by dié geleentheid Senwes se eeuwording as ’n hoogtepunt in sy loopbaan bestempel. “Senwes se beloning is groot aan diegene wat gee,” het hy gesê. Hy het ook erkenning gegee aan klante, verskaffers en personeel – elk sonder wie Senwes se visie om die mees geadmireerde agri-besigheid in Suid-Afrika te wees, nie realiseerbaar sou gewees het nie.
’n Saluut aan die Direksie
Die Senwes Direksie het deur die jare heen ’n geweldige groot rol gespeel in die ontwikkeling van Senwes tot die landboureus wat hy vandag is. As voorsitter is Japie Grobler een van elf wat Senwes as leier dien.
In Senwes se gedenkpublikasie word Japie aangehaal: “Te midde van uitdagende landbou- en besigheidstoestande verskuif Senwes deurlopend die doelpale van ekonomiese wins; met stabiele wins-gewendheidsvlakke wat gevestig is en jaarliks gehandhaaf en verbeter word”.
Tydens 2009 se Direksiefunksie het een van Senwes se voorkeurverskaffers, Sanlam, ’n gelukwensing in die vorm van ’n geraamde boodskap aan Senwes oorhandig. Japie Grobler het as voorsitter ook ’n oorkonde van meriete ontvang. Japie se toespraak van die aand, sowel as Senwes se jaarverslag, is ook in die tydkapsule by Senwes Hoofkantoor se ingangsportaal vervat.
Liefdadigheid word nie uitgesluit nie
Op Woensdag, 13 Mei het Senwes as hoofborg van die jaarlikse Prestige Sportaand, in samewerking met OFM, opgetree. Die opbrengste van die aand is aan die Agri Securitas-trustfonds, ’n fonds wat hulle beywer vir die bevordering van plaasveiligheid, oorhandig. Hierdie kan gesien word as Senwes se liefdadigheidsprojek tydens hul 100ste bestaansjaar, aangesien die maatskappy ook onderneem het om alle winste wat uit die Senwes DVD gegenereer word, aan Agri Securitas te skenk.
Die aand se verrigtinge, wat ’n veiling van rugby-memorabilia ingesluit het, het ’n totaal van R128 000 in Agri Securitas se koffers gesit.
Volgens Gary Stroebel (Hoof Uitvoerende Beampte: OFM), doen die Agri Securitas-trustfonds onge-looflike werk deur bystand aan landelike gemeenskappe te bied om hulle sodoende te help om hulself te help. Hy noem ook dat hierdie byeenkoms OFM die geleentheid bied om aan die landbougemeenskap terug te gee. “Ons is trots om met Agri Securitas geassosieer te word. Dit is ook ’n voorreg vir ons om die aand saam met ons vennoot, Senwes, aan te bied – veral in hul 100ste bestaansjaar.”
Hugh Bladen, bekende rugbykommentator, het as gasspreker opgetree.
In die argiewe opgeteken
“Tyd kweek wenners. Senwes – ’n Eeu van landbou” is ’n spesiale gedenkboek wat in opdrag van Senwes nagevors en saamgestel is. Hierdie lywige kykie na die geskiedenis van Senwes deur Prof Elize van Eeden, historikus en navorsingskonsultant verbonde aan die Noordwes Universiteit, is op 24 Augustus by ’n spogfunksie in Johannesburg bekendgestel.
Die boek neem die leser op ’n reis deur die landbou-landskap van die afgelope 100 jaar, waar Senwes as koöperasie begin het en deur harde werk en deursettingsvermoë ’n plekkie in die landbougeskiedenis (van 1909 tot 2009) uitgebeitel het.
’n Eerste kopie van die boek is aan Japie Grobler, as verteenwoordiger van die huidige en vorige direksies, oorhandig. Johannes Möller (President: Agri SA) het namens georganiseerde landbou ’n eksemplaar in ontvangs geneem.
Die ernstigheid van ’n eeu van landbou wat in die boek aangebied word, word ingekleur deur interessante grafika en fotomateriaal. Dit lees gemaklik en die tong-in-die-kies-staaltjies en grepe uit die verlede bring heelwat ligte oomblikke na vore.
Soete resultate
Met die aankondiging van ’n rekord-omset en winssyfer, het Senwes se eeufeesvieringe sommer ’n ekstra lekkerte bygekry. Die finansiële resultate wat vir die jaar tot 30 April 2009 aangekondig is, het die omsetskaal op R11,2 miljard getrek, wat ’n 46%-verbetering op die vorige jaar aandui.
Hierdie omset is omgeskakel in ’n winssyfer van R368 miljoen – Senwes se beste nog! Dit is veral indrukwekkend as daar onthou word dat Senwes nie te lank gelede nie op die afgrond van bankrotskap gestaan het.
“Die afgelope jaar se gunstige landbouseisoen het ’n gesonde basis geskep vir die resultaat. Dit het die momentum verskaf sodat ’n stewige prestasie gelewer kon word deur beide Senwes Village en Senwes Grainlink, met sterk ondersteuning deur Senwes Credit. Vanjaar is dit opnuut bewys dat Senwes se sakesukses gesetel is in sy fokus op kernbesigheid en die uitbou en versterking daarvan. Gepaste geleenthede wat beide geografiese en kommoditeit-uitbreiding bied, kan sakesukses verder verhoog en markaandeel uitbrei, wat kan lei tot die verdere veredeling van aandeelhouerswaarde,” het Johan Dique gesê.
“Hierdie uiters bevredigende resultaat is die kulminasie van die destydse omdraaiproses, implementering van strategie, fokus, uitbou van die kernbesigheid, doelgerigte leiding deur die Direksie en die vlak van eienaarskap wat deur personeel gedemonstreer is. Ons gee hiermee erkenning aan al ons voorgangers se harde werk, toewyding en insig en terselfdertyd ook aan ons huidige belanghebbendes,” het hy bygevoeg.
Só word Senwes onthou
Om klante se deelname in die Senwes eeufeesvieringe ’n hupstoot te gee, het Senwes verskeie gedenkitems vervaardig, wat as aandenkings gekoop kan word en ’n spesiale bottel Jerepiko-wyn en gedenkmunte insluit.
Senwes het ook ’n eie lied op DVD laat opneem. Dit is dié DVD-verkope wat ’n geldjie bydra tot die Agri Securitas-trustfonds. Christo van der Westhuizen van die reklamemaatskappy, Faction Lara Group (FLAG) en Johan Laas (komponis) het die li-rieke van die liedjie geskryf en die musiek gekomponeer. Daarna is gekyk watter kunstenaars se stemme by die genre van die liedjie sou pas. Daar is besluit op Théan Kotzé en Helena Hettema. Die liedjie My Land is op die radiostasies van OFM, RSG en PukFM gespeel.
’n Eie korporatiewe DVD-produksie, wat die waarde van Senwes vir die klant oor die afgelope 100 jaar dokumenteer, is ook vervaardig. Dit beeld die verskeie probleme uit wat die landboubedryf vroeër jare geteister het. Die DVD bevat ook ’n lang en kort weergawe van die My Land-musiekvideo, sowel as ’n Afrikaanse en Engelse kopie van die Senwes 100 DVD.
Langs die krieketveld
Krieketontwikkeling lê Senwes na aan die hart en die Senwes Spinners-program, wat streef na die ontwikkeling en bevordering van dié gentleman’s game in die landelike gebiede van Suid-Afrika, het gelei tot ’n gemaklike vennootskap tussen Senwes en die Noordwes Krieket Assosiasie.
Uit hierdie vennootskap het Senwes se borgskap van die krieketstadion in Potchefstroom gevloei. Dié stadion staan tans as Senwes Park bekend en is ook in die eeufeesvieringe betrek. Elke krieketspeler wat 100 lopies en meer op Senwes Park aangeteken het tydens geselekteerde wedstryde gedurende 2009, het vir ’n kontantbedrag gekwalifiseer, terwyl elke 100ste toeskouer ’n R500-koopbewys ontvang het.
Die toekoms in...
Met ’n nuwe, groen handelsmerk wat uitgerol is om Senwes se bedryfspunte en hoofkantoor-voorkoms op te dateer, is Senwes reg vir die volgende 100 jaar – nie net om as maatskappy die pad te loop nie, maar ook om te groei saam met sy klante, die produsente, sonder wie Senwes nie kan oorleef nie.
Klante gee hul mening
“Uitstekend! Ons het dit baie geniet. Dankie.” – H.A. Enslin
“Wonderlik, Senwes! Julle kan julself ’n groot pluimpie gee vir die aanbieding.” – George Hayes
“Uitstekend, Senwes uitstekend! Wanneer doen ons dit weer? Net die allerbeste vir die volgende 100 jaar.” – Louis Robbertse
*Bostaande terugvoer is deur middel van die Senwes webblad ingesamel. Besoek gerus die webwerf by www.senwes.co.za
Personeel sê hul sê
“It was mind blowing, all artists were great as well as the event itself! Thanks.” – Maggie Faku (General Clerk, Senwes Village)
“Outstanding, I must say. For one, I was very sceptical about going – because spending the night listening to boeremusiek was not my idea of fun. But the show was spectacular – from the costumes to the stage and not to mention the performance. Thanks for inviting us to this wonderful experience.” – Motshidisi Taunyane (General Clerk, Senwes Corporate Services)
*Bostaande terugvoer is deur middel van die Senwes webblad ingesamel. Besoek gerus die webwerf by www.senwes.co.za
Elmarie Cronje is Redakteur van die Senwester.
Foto’s
Foto 1: Johan Grobler (Assistent Hoofbestuurder: Korporatiewe Bemarking), Toks van der Linde en Kevin Smit (Produkbestuurder: Senwes Village) kort voor die Skouspel vertoning.
Foto 2: Die Abraham Kriel-kinderhuis het ’n dag by die Sun City “Valley of the Waves” geniet.
Foto 3: George Prinsloo (Agrinet), Eddie Engelbrecht (Degesch), Steven Alberts en Gerrit Maritz (Absa) is gereed om af te slaan by die Huisgenoot/Senwes prestige gholfdag in Sun City.
Foto 4: Toks van der Linde en Elma Postma tydens die John Deere ride on-kompetisie.
Foto 5:Senwes personeel vier Senwes se 100ste verjaarsdag.
Foto 6: Johan Dique, prof Elize van Eeden, Japie Grobler en Johannes Möller tydens die bekendstelling van Senwes se eeufeesgedenkboek.
Foto 7: Gerrit van Zyl (Hoofbestuurder: Senwes Credit), Steven Alberts en Alec Azar (Senior Kredietbestuurder: Senwes) by Senwes en OFM se jaarlikse Prestige Sportaand, ten bate van Agri Securitas.
Foto 8: Helena Hettema oefen haar note vir die Senwes lied.
Foto 9: Japie Grobler plaas sy toespraak, tesame met die jaarverslag, in die tydkapsule tydens die Direksiefunksie, terwyl Johan Dique toekyk.