1. Subkliniese mastitis
2. Behandeling van subkliniese mastitis
3. Foto’s
    

Subkliniese mastitis
Die beste en mees praktiese metode om subkliniese mastitis in die melkstal te diagnoseer, is met die California Mastitistoets (CMT, ook genoem die California Melkseltoets). Net melkprodusente waar daar so te sê geen of baie min faktore wat mastitis in die hand werk (predisponerende faktore) op die plaas aanwesig is, moet subkliniese mastitis uierkwarte behandel. Indien daar baie predisponerende faktore tot mastitis aanwesig is, sal die koeie/kwarte wat vir subkliniese mastitis behandel word weer mastitis opdoen binne ‘n baie kort periode (weke) na behandeling omdat die predisponerende faktore nog aanwesig is.

Behandeling van subkliniese mastitis
Een buisie antibiotika (mastitispreparaat bv. Prokaïen-penisillien G en dihidrostreptomisien) waarvoor die mastitisveroorsakende bakterieë gevoelig is, moet twee tot drie maal met twaalf-uur tussenposes (of soos die veearts dit voorskryf) na melking en deeglike speenpunt-ontsmetting in die aangetaste uierkwart gedeponeer word. Hierdie behandeling sal in die meeste gevalle subkliniese mastitis elimineer. Toets die subkliniese besmette uierkwart vyf dae tot agt dae na die laaste behandeling met die CMT om te bevestig of die subkliniese mastitis geëlimineer is of nie. Moenie direk na die behandeling die uierkwart met die CMT toets nie, want die toets sal nog positief wees as gevolg van ‘n hoë SST.

Voorkoming van nuwe speenkanaal- en uierbesmettings (infeksies):

• Speendoop (ontsmettende speendoop of -sprei): alle spene van koeie moet na melking gespeendoop of -sprei word.
• Voorkom speenpunt- en speenbeserings.
• Binne-uierse antibiotiese droëkoei-behandeling in al vier uierkwarte na die laaste melking met die afdroog van ‘n koei, elimineer in baie gevalle bestaande uierbesmettings en voorkom nuwe speenkanaal- en uier-infeksies gedurende die droë periode.

Elimineer predisponerende faktore tot mastitis:
Indien enige van hierdie predisponerende faktore (foutiewe melkmasjien, onvriendelike omgewing, vlieë, onopgeleide melkers, swak-/wanvoeding en stresfaktore) tot mastitis op die melkplaas aanwesig is, verhoog dit die risiko van uierbesmettings en die voorkoms van mastitis.

‘n Bayer produk waarmee mastitis behandel kan word: Penstrep 300 D (G98 Wet 36/1947): Mastitis infusie vir die behandeling van mastitis in beeste.

Dr JH du Preez bespreek mastitisgevalle by melkbeeste.

 

Foto’s

Kliek op die foto om ‘n hoër resolusie weergawe te sien.

Deursnit van die koei-uier met erge mastitis.

Mastitis in die uier.