Suid-Afrika is aan die vooraand van ‘n heel nuwe era waar breëband-kommunikasie die norm, eerder as die uitsondering, sal word. Tegnologie soos derdegenerasie-selfoontegnologie (3G) maak breëband-toegang tot data en die internet baie makliker. Breëband-tegnologie maak ‘n einde aan stadige en swak internetverbindinge. Waar die radio of televisie vroeër die enigste bron van inligting was, maak die gebruik van en toegang tot die internet dit vir produsente moontlik om inligting makliker te bekom.

Die groot verskil tussen konvensionele internet-toegang (inskakel) en breëband-tegnologie is dat die gebruiker nie meer deur ‘n gewone telefoonlyn en modem hoef in te skakel na sy diensverskaffer nie en dat ‘n mens 24 uur per dag, sewe dae van die week, aan die internet gekoppel kan bly.

Die koste verbonde aan breëband-tegnologie is seker die enigste ongunstige faktor wat die vinnige groei van breëband-toegang in Suid-Afrika rem. Benewens die breëband-diens self, moet ‘n bykomende bedrag in sommige gevalle vir ‘n internet-diensverskaffer betaal word. Dié koste is egter stadig besig om te daal soos wat meer mense van dié diens begin gebruik maak. Die toetrede van meer rolspelers sal hopelik ook ‘n prysoorlog veroorsaak.

GPRS (General Packet Radio Services) bied ‘n heeltydse internet-verbinding aan verbruikers en maak dit moontlik om data oor ‘n bestaande selfoonnetwerk te stuur. Dit stel die verbruiker in staat om data deur ‘n selfoon te stuur en te ontvang. Die verbruiker het dus internettoegang, kan e-posse stuur en ontvang en kan data aflaai. Hoewel GPRS verbruikers deurentyd aan die internet gekoppel is, betaal hulle slegs vir die hoeveelheid data wat wat oorgeplaas word.

Die nadeel van GPRS is die lae spoed – veral die oplaai-spoed – en die hoë koste van data met die verskillende pakkette van diensverskaffers. Die spoed is ook baie afhanklik van hoe ver ‘n mens van die seltoring af is en hoe besig die toring met gewone stemoproepe is. Die voordeel weer, indien jy ‘n Blackberry besit, is dat jy ten volle mobiel is.

3G, die nuutste toevoeging tot breëband tegnologie, is ook ‘n draadlose kommunikasiediens wat heeltydse internetverbinding verseker. Die verskil lê egter in die spoed. 3G maak dit vir gebruikers moontlik om hoëspoed-toegang tot datanetwerke en die internet te kry. Met 3G-tegnologie is dit moontlik om e-pos en internettoegang deur middel van palmrekenaars of Blackberry in jou sak rond te dra.

3G tegnologie bied moeitevrye, draadlose toegang tot die internet. Hoewel 3G tegnologie nog nie oral beskikbaar is nie, kan gebruikers steeds op die GPRS netwerk staatmaak. 3G maak verhoogde bandwydte beskikbaar: tot soveel as 384 Kbps wanneer ‘n toestel staties is of teen voetgangerspoed beweeg, 128 Kbps in ‘n motor en 2 Mbps in vaste toestelle.

Vodacom

Die Vodafone Mobiele konneksiekaart is 3G en GPRS magtig en maak toegang tot die internet en die aflaai van e-posse byna drie keer vinniger as met ISDN.

 Wanneer toegang tot Vodacom 4 me-inhoud en internetdienste deur 3G of GPRS verkry word, betaal jy slegs vir die stuur en ontvang van data, nie vir die hoeveelheid tyd wat jy aan die internet gekoppel was nie.

Selfoongebruikers kan ook uitsien na die nuwe 3G-selfone wat Vodacom na Suid-Afrika bring. Dié selfone het heelwat meer geheue en sterker verwerkers om die breëbandtoegang doeltreffend te benut.

Die fone het ook uitstekende kleurskerms en klankvermoë sodat gebruikers video’s sal kan kyk of die jongste musiek van die internet sal kan aflaai en luister. Sommige fone sal ook speletjies-aanhangers die vermoë gee om deur die 3G-netwerk met mekaar mee te ding.